من أجمل قصائد خالد الفيصل

الله اكبر كيف يجرحن العيون
كيف مايبرى صويب العين ابد
احسب ان الرمش لاسلهم حنون
اثر رمش العين ما ياوي لاحد
يوم روح لي نظـر عـينه بهون
فـز له قـلبي وصفـق وارتعـد
لـفني مثـل السحـايب والمـزون
فـي عيوني برق وبقلـبي رعـد
نقض جروحي وجدد بي طعون
قلت : يكفي قالت:عيونه بعـد
وانعطف هاك الشعر فوق المتون
وانـثـنى عـوده وقـفى وابـتعـد
اشـغـلتـني نظرة الـعين الـفـتون
حـيـرتـنـي يالــتوعـد والـوعـد
هي تمون العين والا ما تـمـون
لـى خـذت قـلـبي وقـفـت ياسـعـد

من يقول الزين مايكمـل حـلاه
كل شي(ن) في حبيبـي اكتمـل
الله اللـي كملـه والله عـطـاه
مابقى للزين فـي خلّـي محـل
العيون أحلى من عيون المهـاه
شافها قلبي و صفّـق و احتفـل
نظرته من فتنتـه شعلـة حيـاه
والجفون من الحيا فيهـا كسـل
ساهم(ن) رمشه على الخد وسناه
كن لمعة وجنتـه ورد(ن) وطـل
الشفايا كنهـا جمـر الغضـاه
تحرس الريق المحلّى بالعسـل
والشعر ليل(ن) نقل حمرة مساه
أجعد(ن) حوّل على صدره همل
مايج من فوق متنـه ماطـواه
لون شلال(ن) مع المغرب نزل
وأنطلق جيده يماري في بهـاه
فوق مياس(ن) تعزّل واعتـدل
بالرشاقه فيه من ظبي الفـلاه
لي مشى كنّه على الروح انتقل
ريحته من كل زهـر(ن) منتقـاه
والزيـاده للخزامـى والنـفـل
صافي(ن) مثل المطر فوق الصفاه
باسـم مثـل البشايـر بالأمـل
جامع(ن) من كل زيـن منتهـاه
مستحيل الوصف في خلي سهـل
كايد(ن) ماهو يلين لمـن بغـاه
يرتفع عن كـل سقطـات الزلـل