رمضان في واد سوف

من طرف **عادل لطفي** الجمعة يوليو 22, 2011 5:24 pm

انا اليوم راح نحكي علي واد سوف وتحضيراتها لرمضان

اول انحب نتكلام بسوفي وكان مافهمتوشي انعاود انجي ونفهمكم

المهم نبدو

يامعين ويامسهل سهل لينا احنا في واد سوف اقبل رمضان بشهار ولا شهرين

نشرو القمح ولا لفريكونرحوه بكري كانو يجيبو الرحي تاع الحجرة ويرحو بيها تواطورت لحكاية ولات

بي المشينى ندو يرحو لينا بالمشينى برحة

هذي انسموها التشيشة وانتم اتسموها الحاري

ونشرو الكصبر والكروية كاين ناس ازيدو معه ياسر حوايج اخلطوهم مع بعض

بصح احنا انديرو كصبر وكاروية انصفوهم ونخلطوهم مع بعض وندوهم لرحي يرحهم

نشرو القرفة والفلفل لاسودوكمون لخضر

هذم نشروهم قبل رمضان الي مايديرش هكا يسمة مزال مجاش عندو رمضان
لما اكونو اصفو في هاد لحوايج اناس اتكون فرحانة برمضان

وزيد نشرو اماعن جديدة لما يقرب رمضان انقولو اقبل بنهار نشرو العين بقرة انتم اتسموها العينة والزبيب وسميد وكان بكري حتي الكسكس اناس اتكسكسو قبل الرمضان تو ولينة نشرو من السوق
ونشرو الخميرة تاع الخبز والحمص ونشرو اللحم كاين الي يذبحو يكونو امربين الغنم يذبحو قبل رمضان بيوم ولي معنداش مسكين باش يشري ولا اربي الغنم تلقاه عنده الدجاج اربيه الرمضان ولا حمام
والنهار لول يجي رمضان انطيبو الجاري تلقاه اغلب الناس النهار لول اطيبو جاري وحاجة وحدة معاها وطيبو الخميرة الي اتقلولها انتم المطلوع وطجين حلو وسلاطة ودسير علاش مايكثروش التطياب النهار لاول علي خاطر اشوفو رواحهم الي راهم قادرين ياكلو هكاك ولا ممكن ازيدو حاجة اخرة
بصح في رمضان تلقا كل واحد يتشاها وحدو ايولي جاري وطجين زيتون دوبارة الفول او الحمص ادورة والشطيطحة دجاج البيتزة السندوتش السنبوسك لمحاجب بو زلوف كاين الي ديرو جلبانة بيضاء ولا حمراء والكفتاجي التجاج في الكوشة بطاطة في الكوشةالمهم هذي اشواي من المئكولات الي في راسي انجو لسهرات رمضان عندنا احنا منخرجوش البرا لشوارع لا احنا انزور اقاربنا او جيرنا اخر صلات العشاء الناس كامل تلقاها الدور انقصرو نتلمدو كامل في دار وحدة ونزيدو غدوة في دار اخرة انحطو القهوة والقزوز والتاي معاهم الكوكاو المكشار والزلابية او قلب الوز او اذا كانو مطيبين مقروض احطو مقروض او قريقشات لانو المقروض والقريقشات انطيبوهم نهار لول تاع رمضان
بعد مانكملو الصهرة كل واحد اروح الدارهم

يالله يزيكم الي كاين اسئلة راني هنا بصح لازم اتردو ومش اطلو وتروحو والي عندو اي استفسار اقول ماتحشموش من اختكم ان شاء الله برك اتكونو فاهمين الكتيبة والهدرة ويعجبكم الموضوع والفكرة
نتمني من الكل الي يدخل احط رد واذا حب يحكي علي رمضانهم هوا ثاني كولي اذان صاغية مذابينة نتعرفو الكل علي عداتنة وتقليدنة

من طرف **TARKANO** السبت يوليو 23, 2011 12:41 am

ههههههههههههههههههههههههههههههههههه
راك هايل عادل بصح نأكدلك الأكثرية مراهمش فاهمين هههههههههههه

من طرف **عادل لطفي** السبت يوليو 23, 2011 3:36 am

ههههههههههههه
أعلم عزيز والذي لم يفهم يقول ما لم يفهم ونترجم لها
والحمد لله المنتدى يوجد بها نساء سوفيات
هن من يردن على الأسئلة
كم أسعدني مروارك الجميل
جزاك الله كل الخير

رمضان في واد سوف

رمضان في واد سوف

رد: رمضان في واد سوف

رد: رمضان في واد سوف