يــــــا لي سألتيــــني على الحجـــــــاب و قلتي لي وعــــــلاش مــا تكتبش عليه

من طرف **ريانية العود** الأحد نوفمبر 20, 2011 4:48 pm

أردت في هذا الطرح أن أضع بين أيديكم قصيدة لأحسن الشعراء الجزائريين الذين يكتبون باللهجة الجزائرية اسمه " فيصل كرشوش" أتمنى أن تنال إعجابكم
اسم القصيدة: الحجاب

قصيدة الحجاب

يــــــا لي سألتيــــني على الحجـــــــاب و قلتي لي وعــــــلاش مــا تكتبش عليه

نقــــولك بنت النــــــاس غلطتي فالباب أنا مــــاني عـــالـــــم و مـــــــاني فقيــــــه

نقولك برك الحق باه ما نكــونش كذاب و لا شيطـــــــان أخــــــرس و نسكت عليه

نشدك من قلبــــــك و نوصلــــك للـباب و البــــــاقي عليــــــــك أنتـــيا لي تكمليه

أتوجــــــهي لله وأفـتحــــــي لكتـــــــاب أقــــــراي القرآن و حــــــاولي تفهميــــه

الذكر اليسيــــــر الســـــاهل ما يصعاب و ربي سبحــــــانُو وحــــــــدُو اســــأليه

و رايي أنـــــــا ما تديريلــــوش حساب و حتــــى راي النـــاس ما تحوسيش عليه

مـــــا دام نـــزّل الحكـــــم الصــــواب و ربــــــي سبحـــــــــانو تكلـــــــم عليـــه

فـــــي سورة النــور و سورة الأحزاب ربي الخــــــــــالق يـــــــــأمر فــــــي نبيه

يستــــر بناتو وزواجو بالـحـجـاب ويستر المومـــنات صـــــلى الله عليه

لبنادم كان حــاب ولا ماشي حـــاب هنــــــايا الأمر مــــــاهوش فــي يديه

الي قــــالها ربي نديـرها بالترحاب ربي قالك ديريه امـــــالا غيــر ديريه

على خـــــاطر هـــو الرحيم التواب والّي يرحمـــــو راه يتـــــوب عليــــه

ويــــــلا تــــاب عليه يفتحلو لبواب بــــاش يربح هــــنا او يربـح الهيه

ولوكان اتديريه ايمــــانا واحتساب وبنية صـــــــادقة او خــــــالصة ليـه

اتــــأكدي بلي رايح يجيــــك شباب وما كـــــانش الوحدة الي ندمت عليه

صح فــــالأول راح عليك يصعاب يجي ليك إبليس يلعنــــو ويخزيه

يقولك مــــــازالك فــي عز الشباب هاذ الزين كامل راكي رايحة تخبيه ؟

الايمان فالقلب وانت راكـي صواب روحي شوفي كيفاه رام يمرمدو فيه

زعما من برى راهم ديـــرات حجاب والي مخبــــي غير ربي الي يعلم بيه

قوليلو يا بليـــــس كـــــلامك شباب مليـــــح الي يطيـــع ربي وما يعصيه

لكن البنــــــــادم خطــــــاء تــــواب لما يعمل السوء ما لازمش يجهر بيه

والي يستر روحوا و يعمل حسـاب لهـــــاذاك النهار لمّــــا نروحـــوا ليه

ربي يسترو فـــــي يـــــوم الحساب يحاسبو والناس كـــــامل بعــاد عليه

خير ملّـي يفضـــــحو قدّام لحباب خــاوتو واصحـابو واهـلو وامـاليه

ويقراو كامل واش كاين في لكتاب الـــــي ربــــي وحدو هو العــالم بيه

يالي سألتيـــــني علـــــــى الحجاب هذا هو الشـــي الّي قــــدرت عليه

و يلا حتى اللهنا مالقيتيش جـواب لجواب تلقايه ....نهـــــار اتديــــريه

امين يا رب العالمين

من طرف **TARKANO** الثلاثاء نوفمبر 22, 2011 3:46 pm

مشكوووووورة ريانية على اهتمامك باللهجة الجزائرية ننتظر تعلمك لها في اقرب وقت . بورك فيك ودمت بود .

يــــــا لي سألتيــــني على الحجـــــــاب و قلتي لي وعــــــلاش مــا تكتبش عليه

يــــــا لي سألتيــــني على الحجـــــــاب و قلتي لي وعــــــلاش مــا تكتبش عليه

رد: يــــــا لي سألتيــــني على الحجـــــــاب و قلتي لي وعــــــلاش مــا تكتبش عليه